Меню

/1929-1982/. Завхан аймгийн Жавхлант сум. Яруу найрагч. Соёлын гавьяат зүтгэлтэн /1979-01-08. №02/, төрийн шагналт /1967/.
    1949 онд Улаанбаатарт Санхүү, эдийн засгийн техникум, 1959 онд Москвад М.Горькийн нэрэмжит утга зохиолын дээд сургууль төгсчээ. Архангай аймагт нягтлан бодогч, НАХЯ-ны ХЗЭ-ийн хорооны нарийн бичгийн дарга, “Залуучуудын үнэн” сонины сурвалжлагч, “Улаанбаатарын мэдээ” сонины хариуцлагатай эрхлэгч, МЗЭ-ийн хороонд яруу найргийн зөвлөлийн эрхлэгч, мэргэжлийн зохиолч, мөн хорооны нарийн бичгийн даргаар ажиллаж байжээ. Уран бүтээлээ 1949 оноос эхэлж “Бидний хүсэл”, “Цэнхэрмандлын тэнгэр дор”, “Мөнгөн хазаарын чимээ”, “Хар ус нуурын шагшуурга”, “Хээр хоносон сар”, “Намрын мөнгөн өглөө”, “Тэхийн зогсоол”, “Ээлтэй сэлэм”, “Үд дундын тэнгэр”, “Дэлхий”, “Бүсгүй хүнийг хайрлах сэтгэл”, “Түүвэр зохиол” /3 боть/ зэрэг номууд хэвлүүлсэн. “Ялалтын жигүүр”, “Цусны өнгө улаан” драмын жүжиг бичиж тоглуулсан байна. Горькийн сургуульд суралцсанаар Монголын яруу найрагт эмзэг мэдрэмж, хайр сэтгэлийн тансаг уянга, сэтгэхүйн гүнзгийрлээр шинэчлэл хийж 1960-аад оноос олон залуу авьяастныг араасаа дагуулж их утга зохиолд оруулсан нь өнөөгийн нэрт зохиолчид болоод байна. 1960-аад оны эхний хагаст МУИС-ийн дэргэд утга зохиолын оройн дээд сургууль санаачлан байгуулж хичээллүүлэн нэг удаагийн төгсөлт хийсэнд тухайн үеийн олон зохиолч суралцаж мэдлэг, боловсролоо зузаатгаж, уран чадварын хувьд ахиц дэвшил хийснээр Монголын шинэ үеийн уран зохиолын хөгжилд нэмэр түлхэц болсон байна. Зохиол бүтээл нь дэлхийн 70-аад хэлнээ орчуулагдсаныг Монголын яруу найргийн ололт гэж үзэх нь зүйд нийцэх бөгөөд нас барахад нь зарим орны хэвлэлд “Дорнын их яруу найрагч” хэмээн үнэлэн тодорхойлсон нь үүнийг бататгана. Ли Бай, Гете, Мирзо Турсан Заде, А.Софронов зэрэг дорно, өрнийн хийгээд ЗХУ-ын алдарт зохиолчдын шүлэг, найраглалуудыг эх хэлнээ орчуулж тусгай номууд хэвлүүлсэн байна. Ардын Их хурлын депутатаар сонгогдож байжээ.