Меню

/1929/. Дорнод аймгийн Матад сум. МУИС-ийн амьтан судлалын тэнхмийн багш байхдаа Гавьяат багш /1997-11-13. №61/.
    1941 оноос эхлэн сургууль соёлын мөр хөөж МУИС-ийг дүүргэжээ. 1955 оноос МУИС-д багш, Шинжлэх ухааны академийн Биологийн хүрээлэнгийн захирал, 1974-1982 онд Ерөнхий ба сорилын биологийн хүрээлэнгийн захирал, 1982 оноос Шинжлэх ухааны академийн эрдэмтэн нарийн бичгийн дарга, 1982-1995 онд МУИС-д ректор, 1995 оноос мөн сургуулийн биологийн факультетын амьтан судлалын тэнхимд тэргүүлэх багшаар ажиллаж иржээ. “Монгол орны төв ба өмнөд нутгийн махчин шувууд, тэдгээрийн практик ач холбогдол” сэдвээр 1964 онд биологийн ухааны дэд доктор, “БНМАУ-ын ан амьтан, агнуурын аж ахуйн хэтийн төлөв” сэдвээр1974 онд биологийн шинжлэх ухааны докторын зэрэг хамгаалж, 1982 онд Шинжлэх ухааны академийн жинхэнэ гишүүнээр сонгогдсон байна. Олон жил их сургуульд багшилж мэргэжлийн боловсон хүчин бэлтгэхэд эрдэм мэдлэг, авьяас билгээ зориулж профессор цол хүртсэн сурган хүмүүжүүлэгч, Монгол орныхоо махчин шувуу, агнуурын хөхтөн амьтны биологи, экологийг судалж, ондатрыг эх орондоо нутагшуулах ажлыг удирдсан эрдэмтэн, Шинжлэх ухааны академийн ерөнхий ба сорилын биологийн, ботаникийн, ардын эмнэлгийн хүрээлэнгүүдийг байгуулж, материаллаг бааз, чадварлаг боловсон хүчнээр бэхжүүлсэн удирдах ажилтан, зохион байгуулагч ажээ. “Улсын төв музейд байгаа ан, амьтад”, “БНМАУ-ын ховор амьтад”, “Амьтан судлал” /дээд сургуулийн сурах бичиг/, “Байгалийн шалгарал ба бэлчээрийн мал аж ахуй”, “Үлийн цагаан оготно” гэхчилэн судалгаа, сурталчилгааны олон арван ном, бүтээл туурвижээ. “Алтан гадас” одон, Ардын хувьсгалын ойн хүндэт медалиудаар шагнагджээ.